كلمات اغنية فارس - زاب ثروت و احمد شيبة 2018
حكاية فارس من البوم المدينة

فارس.. يا فارس نبيل عمال بينده بينادى من زمان ولحد امتى هينده
من صغر سنهم واللقاء مابينا عاده تلاته كل واحد فينا مختلف بزيادة
نبيل الهادى فينا والعاقل بنشوفه اكبر لكل موقف عنده حكمة وعمره ماليها كرر
وعكسه فارس شقى طول عمره مهما كبرنا قلبه طاير ودمه فاير اكتر منا

وانا بحر الوسطاني بينهم فيا منهم الاتنين بتجنن
وابقى عالي وارجع اهدى في ثانيتين
جربنا حاجات كتير لعب وهزار وفرح واستحملنا برده
ياما حزن وخناق وجرح وكبرنا اكتر ولقينا العيشة
مش بالساهل لو مهما زاد الحمل بصحابي انا هبقى قادر

بس الحمل زاد يا صاحبي وجه وقت البعاد
ده كلام في عقل فارس لما بيغرق في السكات
ونبيل كلامه ثابت بكرة أحلى لو حاولنا

مش هنلوم الظروف والزمن وده حظ جيلنا
وفي ثانية كانت تقوم خناقة بنهم بعدها
يا عم كفایة حكم مش ناقصين ولا وقتها
ويرد نبيل اصبر يا صاحبي ده الطريق طويل
بكرة القليل على القليل بالصبر يكون كتير

هنستحمل لامتى مستحملنا كتير حاولنا مش هارضى بالقليل
ولاهسمح تلوم في جيلنا كان ودي اقوم افض بينهم بس مش هينفع
طول عمري دورى وسطهم شاهد بيشوف ويسمع

الدنيا بحر عالى والصحاب طوق النجاه يا خوفى
على نفسه فاللى نفسه فيه مهوداه

فات كتير بعد الخناقة اول مرة من سنين يفضى المكان عليه ومنبقاش متجمعين
وبعد ايام جه نبيل عندى يزورنى مشفتش فارس سألنى بخوف اكدلى ظنى
واليوم التانى كان قدامى فارس بيصارحنى ناويت اسافر واتمنى نبيل يكون مسامحنى

مابقتش قادر احاول ومات فيا الامل الحال بيسوء زيادة طب إيه العمل
رغم المجازفة بدون ورق مطمن للطریق اخترت البحر يكون سبيلي وللسفري صديق
لا لازم تحاول تاني تحاول اكتر يا فارس ده انتحار إزاى لنفسك تبرر

اهوالى ازاى هتعديها فى مركب صيد متقولش الموج هيشيلنى ولا كلام تعيد
مش هعرف احميك يا صاحبي مش بأيدي مش هقدر
انا موجي علي وإنت عندي غالى ومتقدر

مقطع احمد شيبه
الدنيا بحر عالى والصحاب طوق النجاه
يا خوفى على نفسه فاللى نفسه فيه مهوداه
خاف على نفسك يا صاحبى وعلى حبيبك بعديك
ده البحر ياما غرق ياما فرق ناس كتير قبليك

نبيل عرف الحقيقة الصدمة كانت اقوى منه
لو شوفوا شكله وقتها تدوله ضعف سنه
كنت مستنيه يجيلي اصلي عرفت انا قبليه
ماهو مات مابين ادياه ولسة في حضني انا مخبيه

لو كان فهم كلامي لو كان لصوتي سمع
لو كان عرف إن كل نقطة فيا دموع ووجع
على فارس واللي قبله واللي هيروحوا بعديه
على أحلام غرقت وراحت جوه البحر اللي مداريه

لو بس حس عذاب غيابه اللي سايبنا فيه
أو لو بس قرا جواب نبيل اللي كاتبه ليه
انا مش هلومك انا و بلوم البحر
بس اللي باقلنا منك حزن والم وقهر

كان نفسى تشوفى ولادي كان نفسى
اشوف ولادك كان نفسى ربى يجعل معادى قبل معادك
كان نفسى ولسة نفسى أشوفك تانى عن قريب
ونفسى ماشفش فارس تانى عن صحابه يغيب

الدنیا بحر عالى والصحاب طوق النجاه يا خوفى
على نفسه فاللى نفسه فيه مهوداه خاف
على نفسك يا صاحبى وعلى حبیبك بعديك
ده البحر ياما غرق ياما فرق ناس كتير قبليك