126
استماع الان
34
74
قصيدة خمسه الصبح - هشام الجخ
استماع لاحقا

كلمات الاغنية

كلمات قصيدة خمسه الصبح - هشام الجخ 2017

خمسة الصبح
كل بواقي الليل بتروّح
ناس بتغمض
و تسلم وردية الغلب لناس بتفتح
و تشطب عربية الكبدة و تعلق يافطة مقفول
فبسرعة الفيروس يتحول عربية فول
و كماين الشرطة المبدورة بتتسلّى على بلاوي الناس
بتمشي الناس
هي كمان زهقت مـ الوقفة و عايزة تروح
خمسة الصبح
هو الوقت الأمثل ليها
إنها تفتح شيش الأوضة
و تطرد كل كلام السهرة الجارح
هو الوقت الفاصل بين دلوقتي
و بين امبارح
كنا زمان نسهر ع الراديو
نتصاحب على أي كتاب
دلوقتي بيسهروا ع اللاب
و تكلم بالمليون واحد
الصادق فيهم كداب
كنا زمان ما بينا مسافة
و بينا بلاد
دلوقتي بنسهر مع بعض لخمسة الصبح
بس بعاد
خمسة الصبح
هو سكوت الفجر في شقة ستي
و خرير المية
و هي بتتوضا في عز البرد
كانت حافظة مكان الراديو
و كبس النور
و ازاي يشتغل القرآن
و ازاي بتعلّي
و انت بتعمل نفسك ميت
لتصحيك وتقول لك صلِّي
و العصافير يستفردوا بيك
صوتهم يعلا و يصحيك
خمسة الصبح
البنت اللي عنيها امبارح كانت قتّالة و دبّاحة
تبدأ تتسحب بالراحة
و تغير لبس الكاباريه
و تلبس واسع
كالعادة التاكس مايرضاش يدخل في الحارة
و ينزلها في آخر الشارع
تنزل تمشي
و جوا ودانها الرقص و ضحك الناس و الخمرة
من جواها الدوشة بتشغي
لكن برة
محَدِّش سامع
و الفقر اما بيفرض جوعه
تتغير له بنود العقد ما بين الشاري و بين البايع
المشهد مفيهوش تفاصيل
غير بنت لوحدها في الشارع
ما حيلتهاش غير جسم حيفضل حلو شوية
و حلم حيفضل طول العمر الباقي ضايع
خمسة الصبح
خَش عليها البيت يستلوح
كان سكران داخل يطوّح
كانت جارته بتكوي هدوم جوزها الشقيان
و بتقفل بلكونة الصالة عشان عارفاه
حيقوم عرقان ..
و البواب غسل العربية و نشّف إيده
و بسرعة المشهد يتحول (عَبد و سِيده )
افتح لي المشهد ع الآخر
هاته لغاية آخر كادر
ماي بيطرحش الملح خضار
و لا يبنيش الأوطان غدر
و القمر اللي يبات طفيان
غير القمر اللي يبات بدر
آه يا سواقي المية الهدر
لساكي عفية و بتدوري
الحب عشان يطرح ناس
مش محتاج فارس اسطوري
الحب عشان يطرح ناس
مش مستني قرار جمهوري
خمسة الصبح
اتقيد ضد المجهول محضر قتل الطفل السوري
آه يا البت اللي بتتلوى
ولا في الرقص عرفتي تهزي
ولا في الثورة عرفت تثوري
.. ليلك زي البحر الهِيج
ولا مركب حيكمّل طافي
و سلاسل نورك كرابيج
و فنارك متغطي و طافي
و انا متعود
ياما البحر حدف أشكال
و اسأل على راسي الطبال
اسأل على شبكي و خُطافي
أنا جدر و غارز في الرملة
أما الضيف اللي بيتسلى
ده بييجي و بيروح خَطّافي
خمسة الصبح بتاعت الفقرا
غير خمسة الصبح البشوات
و الصحيان علشان الرحلة
غير صحيان الامتحانات
و سكوت الشاعر أحيانا
مش معناه ان الشاعر مات
خمسة الصبح
وقت لكل الاحتمالات
للي يعرض
و اللي يكشكش
و اللي يصلي
و اللي يفحش
و اللي يغني
و اللي يحشش
و اللي يونّس
و اللي يلبّش
و اللي كتير احلو عشانه
و هو يوحّش
و اما ازعل و اتكلم عنه
يتنرفز و يقول ما يصحش
خمسة الصبح الوقت المنعش
كل بواقي الليل بتروح
كل عيون الصبح تفتح
لسة رموش السمرا حبيبتي
سهام بتدبّح
لسة العصافير اللي سايبها فـ شجرة بيتنا
بتصحى تسبّح
لسة المشهد زي ما هو
ناس بتشوفه ف غاية الروعة
و ناس بتشوفه ف غاية القُبح
و انا باتّريق ع الاتنين
و باسهر وحدي لخمسة الصبح

اغاني هشام الجخ

استماع الكل

جميع الحقوق محفوظة لاصحابها والموقع غير مسئول عن انتهاك الحقوق الملكيه الفكريه .. اذا كنت صاحب العمل الفني واردت الابلاغ عن سرقة حقوق ملكيته للتاليف والنشر يسعدنا استقبال البلاغ علي الرابط .. وعند الحصول علي ما يثبت حقوق ملكيتك سيتم حذف العمل فورا ونضمن لك عدم اضافته علي موقعنا مرة اخري ..
controls_next
controls_toggle
controls_prev
0:00

0:00

player_volume
player_loop
player_shuffle