كلمات مهرجان ست الدنيا - محمد خليفة 2015

صحيت وفتحت عينيا
ومليت كباية م الحنفية
لقيت الميا لونها طبيعي
طعمها زي المعدنية
شربت تاني واستحميت
لبست ونزلت من البيت
رايح مشوار مهم ضروري
وانا خارج ببص لقيت
الحواري مفيهاش مجاري
ولا في دبان
والرصيف كله نضيف
مدهون الوان
مفيش عفار وتراب
ولا اي حاجة ملوثة
الشارع فيه طلاب
مش هربانين م المدرسة
لما لقيت مكنتي عطلانة
فركبت مواصلات وخلاص
ومفيش واحد م الركاب
ولع سيجارة في الميكروباص
الكل محترم القوانين
مفيش ولا سكة مقفولة
النقل ماسك اليمين
والشارع ماشي بسهولة
مصر بقت حاجة تانية
مش بس ام الدنيا
دلوقتي بلدي ست الدنيا
كل الشوارع فيها اسفلت
ناعم زي الحرير
ومفيش ولا بلاعة مفتوحة
ولا حفرة ولا تكسير
مفيش حد بيكسر اشارة
ومحدش ماشي عكس
ومفيش دخان من شكمان
ولا دوشة من كلكس
مفيش ولا زحمة ولا ظيطة
ولا فوضة ولا حاجة مش تمام
فيه واحد جنب الحيطة
بس مش بيعمل حمام
شجر و زرع ف كل مكان
شامم ريحة الشوارع ورد
واحد عنده كحة بيكح
لاكن مبيتفش ع الارض
ماسك ف ايده منديل
ومرماهوش في النيل
مفيش الفاظ بذيئة
مفيش لسان طويل
محدش خالص كاتب
ع الفلوس و ع الحيطان
ولا حد قفش باب المترو
خلاه واقف عطلان
شوفت الصحاب قاعدين قاعدة
المخدرات مش فيها
شوفت بت موزة وجامدة
محدش اتحرش بيها
والناس كلها شغالة
محدش ع القهاوي
مفيش ولا كوم زبالة
ولا في اي بلاوي
كل المصريين
إصتباحتهم جميلة
و مش مكشرين
مفيش كئابة ولا نيلة
شايف احسن وشوش
منظرهم سمح بشوش
مش متضايقين من حاجة
فايقين مبيسرحوش
مفيش قلق ومفيش خناء
مفيش قرف ولا في غباء
ومفيش ولا مشكلة قابلتني
وانا رايح اخلص اوراء
في مكان حكومي فيه موظفين
ودخلت لقيتهم صاحيين
جاهزين وشايفين شغلهم
وإستقبلوني مش مبرقين
موظفة الحكومة
بسمتها منورة وشها
مش عاملة زي البومة
هادية مش عاوجالي بؤها
بتكلمني مبتزعقليش
مفيش عصبية ولا طنطيت
ما خدتش رشوة متعبتنيش
خلصت مصلحتي ومشيت
موقفتش ع المحطة كتير
أتوبيسي مجاش متأخّر
بركب وقعت من ع السرير
أتاريني بحلم وبشخّر